ກອງປະຊຸມ-ສໍາມະນາຄວາມເປັນຜູ້ນໍາ

ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ (ສວປຝ) ກະຊວງພາຍໃນ ໄດ້ຮ່ວມມືກັບ ສະພາການຄ້າ ແລະ ອຸດສະຫະກໍາແຫ່ງຊາດ ພ້ອມດ້ວຍ ສະຖາບັນການບໍລິຫານປະເທດສິງກະໂປ (SIM) ເພື່ອຈັດກອງປະຊຸມ-ສໍາມະນາ ພາຍໃຕ້ຫົວຂໍ້ “ ການພັດທະນາຄວາມເປັນຜູ້ນໍາໃນການບໍລິຫານທຸລະກິດ ” ໃນວັນທີ 06 ສິງຫາ 2019, ທີ່ໂຮງແຮມຄຣາວ ພລາຊາ, ນະຄອນຫຼວງວຽງຈັນ ກອງປະຊຸມດັ່ງກ່າວໄດ້ໄຂຂຶ້ນໂດຍການເປັນປະທານໂດຍ ທ່ານ ປ.ອ ນາງ ຈັນທາ ອ່ອນໄຊວຽງ ຫົວໜ້າສະຖາບັນ ສວປຝ.

ຈຸດປະສົງເພື່ອເປັນການສ້າງຂີດຄວາມອາດສາມາດໃນການພັດທະນາທັກສະພາວະຜູ້ນໍາຂອງຜູ້ບໍລິຫານທາງພາກລັດ ແລະ ເອກະຊົນໃຫ້ເທົ່າທຽມກັບບັນດາປະເທດສະມາຊິກອາຊຽນ ໂດຍສະເພາະປະຊາຄົມເສດຖະກິດ ແລະ ວັດທະນະທໍາສັງຄົມອາຊຽນ, ການສ້າງຄວາມເຂັ້ມແຂງໃຫ້ແກ່ພາກສ່ວນວິສາຫະກິດກໍເປັນວຽກງານໜຶ່ງທີ່ເປັນບູລິມະສິດຂອງລັດຖະບານ ເຊິ່ງຈະສາມາດເຮັດໃຫ້ຄົນມີວຽກເຮັດງານທໍາ ແລະ ເປັນການຂັບເຄື່ອນເສດຖະກິດຂອງປະເທດໃຫ້ມີການຂະຫຍາຍຕົວຂຶ້ນເທື່ອລະກ້າວ.

ກອງປະຊຸມ-ສໍາມະນາຄັ້ງນີ້ຖືເປັນການລິເລີ່ມປະສານສົມທົບຮ່ວມມືລະຫວ່າງສະຖາບັນຕ່າງໆຈາກພາກລັດ, ວິສາຫະກິດ, ເອກະຊົນ ແລະ ຕ່າງປະເທດ ເຊິ່ງເປັນເວທີແຫ່ງການຮຽນຮູ້, ແລກປ່ຽນບົດຮຽນ ແລະ ປະສົບການເຊິ່ງກັນ ແລະ ກັນ ໂດຍສະເພາະແມ່ນການພັດທະນາຄວາມເປັນຜູ້ນໍາໃນອົງກອນ ເພື່ອດໍາເນີນທຸລະກິດໃຫ້ປະສົບຜົນສໍາເລັດ ແລະ ມີຄວາມຍືນຍົງ ພ້ອມກັນປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຫຼຸດພົ້ນຈາກຄວາມດ້ອຍພັດທະນາຕາມແນວທາງຂອງພັກ-ລັດຖະບານ.

ພາຍໃນກອງປະຊຸມ-ສໍາມະນາດັ່ງກ່າວ ຜູ້ເຂົ້າຮ່ວມໄດ້ມີການປຶກສາຫາລື ແລກປ່ຽນທັດສະນະຢ່າງກົງໄປກົງມາ ແລະ ຄວາມຮູ້ຄວາມເຂົ້າໃຈກ່ຽວກັບການພັດທະນາຄວາມອາດສາມາດໃນການຄຸ້ມຄອງ-ນໍາພາໃນອົງການຈັດຕັ້ງຂອງຕົນ ເພື່ອໃຫ້ມີຄວາມສອດຄ່ອງກັບແນວທາງນະໂຍບາຍຂອງລັດຖະບານ, ສາມາດສ້າງວັດທະນະທໍາໃນການເຮັດວຽກແບບຍືນຍົງ ເພື່ອສົ່ງເສີມແນວຄິດສ້າງສັນ, ການປະດິດສ້າງສິ່ງໃໝ່ໆ ແລະ ການເຮັດວຽກຮ່ວມກັນໃນອົງກອນ.

                                         ໂດຍ: ພະແນກຂໍ້ມູນຂ່າວສານ ສວປຝ