ພິທີປະດັບຫຼຽນກາແຮງງານໃຫ້ແກ່ຊ່ຽວຊານຍີ່ປຸ່ນ

ພິທີດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 05 ພະຈິກ 2019 ທີ່ ກະຊວງພາຍໃນ ໂດຍການໃຫ້ກຽດເປັນປະທານມອບຫຼຽນດັ່ງກ່າວຂອງ ທ່ານ ສີພຸກ ພົງພັກດີ ຮອງລັດຖະມົນຕີ ກະຊວງພາຍໃນ ຕາງໜ້າໃຫ້ຄະນະພັກ-ຄະນະນໍາກະຊວງ; ເພື່ອເປັນການຍ້ອງຍໍສັນລະເສີນຄຸນງາມຄວາມດີຕໍ່ ທ່ານ ໂນະຣິຮິໂກະ ຢາມະດະ (Mr. Norihiko YAMADA) ຊ່ຽວຊານຄົ້ນຄວ້າການປົກຄອງຈາກສະຖາບັນພັດທະນາເສດຖະກິດ (IDE-JETRO) ປະເທດຍີ່ປຸ່ນ ທີ່ມາປະຈໍາການຢູ່ກະຊວງພາຍໃນ ພາຍໃຕ້ໂຄງການ “ປັບປຸງລະບົບການປົກຄອງທ້ອງຖິ່ນຢູ່  ສປປ ລາວ” ທີ່ມີຜົນງານໃນການຊຸກຍູ້ຊ່ວຍເຫຼືອທາງດ້ານວັດຖຸປັດໄຈ ແລະ ເຫື່ອແຮງ ໃຫ້ແກ່ກະຊວງພາຍໃນເວົ້າລວມ ເວົ້າສະເພາະ 03 ພາກສ່ວນຄື: ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ (ສວປຝ), ກົມການປົກຄອງທ້ອງຖິ່ນ ແລະ ກົມເອກະສານແຫ່ງຊາດ ເຊິ່ງມີຜູ້ເຂົ້າຮ່ວມຕາງໜ້າຈາກ ສະຖາບັນ ສວປຝ, ກົມການປົກຄອງທ້ອງຖິ່ນ, ກົມເອກະສານແຫ່ງຊາດ, ກົມຈັດຕັ້ງ ແລະ ພະນັກງານ ແລະ ກົມກວດກາ. ໃນໂອກາດດຽວກັນນີ້ທ່ານປະທານກອງປະຊຸມຕາງໜ້າໃຫ້ຄະນະພັກ-ຄະນະນໍາກະຊວງພາຍໃນກໍໄດ້ສະແດງຄວາມຊົມເຊີຍ ແລະ ຂອບໃຈຕໍ່ ທ່ານ ໂນະຣິຮິໂກະ ຢາມະດະ ທີ່ໃຫ້ການຊ່ວຍເຫຼືອໃນວຽກງານການຄົ້ນຄວ້າການປົກຄອງທ້ອງຖິ່ນຂອງ ສປປ ລາວ ໄດ້ຮັບຜົນສໍາເລັດຕາມລະດັບຄາດໝາຍ ແລະ ທັນຕາມເວລາທີ່ໄດ້ກໍານົດໄວ້.