ຄະນະຜູ້ແທນກະຊວງພາຍໃນເຂົ້າຮ່ວມການຝຶກອົບຮົມຢູ່ຫົວຈົ່ງ

ໃນລະຫວ່າງວັນທີ 24-28 ມິຖຸນາ 2019 ຄະນະຜູ້ແທນຈາກກະຊວງພາຍໃນໄດ້ເຂົ້າຮ່ວມກອງປະຊຸມ-ຝຶກອົບຮົມໃນຫົວຂໍ້ “ ຍົກສູງປະສິດທິພາບໃນການປະຕິບັດວຽກງານໃຫ້ພະນັກງານ-ລັດຖະກອນ ” ທີ່ ມະຫາວິທະຍາໄລວິທະຍາ ສາດ ແລະ ເຕັກໂນໂລຊີຫົວຈົ່ງ (HUST), ສປ ຈີນ. ໂດຍ ທ່ານ ສິງທະວອນ ດາລາວົງ ຫົວໜ້າຫ້ອງການ, ກະຊວງພາຍໃນ ເປັນຫົວໜ້າຄະນະ ພ້ອມດ້ວຍຄະນະທັງໝົດຈໍານວນ 10 ທ່ານ, ຈຸດປະສົງເພື່ອເພີ່ມຄວາມຮູ້ ຄວາມເຂົ້າໃຂກ່ຽວກັບບົດຮຽນ ປະສົບການຂອງ ສປ ຈີນ ໃນການກໍານົດຍຸດທະສາດໃນວຽກງານພະນັກງານ-ລັດຖະກອນ ແລະ ວຽກງານປະເມີນຜົນການປະຕິບັດງານຂອງພະນັກງານ-ລັດຖະກອນ ນອກຈາກນີ້ຍັງເປັນການເສີມຂະຫຍາຍການພົວພັນຮ່ວມມືເຊິ່ງກັນ ແລະ ກັນລະຫວ່າງມະຫາວິທະຍາໄລ ແລະ ສປປ ລາວ ອີກດ້ວຍ.

ຝ່າຍຈີນໂດຍການເປັນປະທານຂອງ ທ່ານ ຊູ ສ່ຽວຕົງ ຮອງອະທິການບໍດີ ມະຫາວິທະຍາໄລວິທະຍາສາດ ແລະ ເຕັກໂນໂລຊີຫົວຈົ່ງ ເປັນຜູ້ກ່າວເປີດພິທີ ໂດຍທ່ານໄດ້ຊີ້ໃຫ້ເຫັນວ່າທາງມະຫາວິທະຍາໄລໄດ້ໃຫ້ຄວາມສໍາຄັນຕໍ່ການຮ່ວມມືກັບ ສປປ ລາວ ເປັນຢ່າງຍິ່ງ ໂດຍສະເພາະການຮ່ວມມືກັນທາງດ້ານການພັດທະນາຊັບພະຍາກອນມະນຸດ, ຈັດຝຶກອົບຮົມໃຫ້ແກ່ພະນັກງານຂັ້ນນໍາລະດັບສູງ ແລະ ການແລກປ່ຽນປະສົບການທາງດ້ານວຽກງານການບໍລິຫານລັດ.

ໃນການເຂົ້າຮ່ວມໃນຄັ້ງນີ້ບັນດາຜູ້ເຂົ້າຮ່ວມໄດ້ເຫັນຜົນສໍາເລັດໃນການຮ່ວມມືລະຫວ່າງ ກະຊວງພາຍໃນ ແລະ ມະຫາວິທະຍາໄລວິທະຍາສາດ ແລະ ເຕັກໂນໂລຊີຫົວຈົ່ງ ໂດຍສະເພາະແມ່ນການແລກປ່ຽນບົດຮຽນກ່ຽວກັບແຜນແມ່ບົດໃນການພັດທະນາຕົວເມືອງອູຮັ້ນແຕ່ລະໄລຍະ, ທັດສະນະສຶກສາສູນໃຫ້ການບໍລິການປະຕູດຽວທີ່ໃຫ້ປະຊາຊົນຜູ້ມາໃຊ້ບໍລິການໄດ້ຮັບການບໍລິການທີ່ມີຄຸນນະພາບ, ມີປະສິດທິພາບ, ມີຄວາມສະດວກ, ວ່ອງໄວ, ຍຸຕິທໍາ ແລະ ໂປ່ງໃສ ດ້ວຍເຄື່ອງມືທີ່ທັນສະໄໝ.

ໃນໂອກາດດຽວກັນນີ້ ທ່ານ ສິງທະວອນ ດາລາວົງ ຕາງໜ້າຄະນະຝ່າຍລາວໄດ້ສະແດງຄວາມຂອບໃຈຕໍ່ ມະຫາ ວິທະຍາໄລໃນການໃຫ້ການຕ້ອນຮັບຄະນະຜູ້ແທນຢ່າງອົບອຸ່ນ ແລະ ໃຫ້ການສະໜັບສະໜູນ ເຂົ້າຮ່ວມການຝຶກອົບຮົມໃນຄັ້ງນີ້. ທ່ານຍັງກ່າວຕື່ມອີກວ່າ ນັບແຕ່ປີ 2013 ເປັນຕົ້ນມາ ທັງສອງຝ່າຍໄດ້ມີການພົວພັນກັນຢ່າງໃກ້ຊິດ; ໂດຍສະເພາະໃນເດືອນພຶດສະພາ 2019 ທັງສອງຝ່າຍໄດ້ເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມື ແລະ ຈັດຝຶກອົບຮົມຄັ້ງທໍາອິດໃຫ້ແກ່ພະນັກງານຂັ້ນນໍາຂອງກະຊວງພາຍໃນ ໃນອະນາຄົດທ່ານຍັງຫວັງວ່າທາງມະຫາວິທະຍາໄລຫົວຈົ່ງຈະໃຫ້ທຶນການສຶກສາໃຫ້ແກ່ບັນດາຜູ້ບໍລິຫານຝ່າຍລາວຕື່ມອີກ.

ສະຖາບັນ ສວປຝ